ब्रेकिंग

क्रीडा

पंजाबचा ३७ धावांनी विजय

Vikrant kulkarni
05 May 2025

धर्मशाळा : पंजाब विरुद्ध लखनौ यांच्यातील रविवारी झालेल्या ५४ व्या सामन्यात पंजाबचा सलामीवीर प्रभासिमरन सिंग याने शानदार अर्धशतक साकारले. त्याने ९१ धावा केल्या. त्याचे शतक अवघ्या ९ धावांनी हुकले. मात्र त्याच्या या कामगिरीमुळे पंजाबच्या संघाने २० षटकांत २३६ धावा केल्या. त्यामुळे लखनौच्या संघाला २३७ धावांचे बलाढ्य आव्हान मिळाले. हे आव्हान लखनौचा संघ पुर्ण करू शकला नाही त्यामुळे हा सामना पंजाबने ३७ धावांनी जिंकला.

पंजाबचा सलामीवीर प्रियांश आर्या हा १ धावेवर बाद झाला. तर जोश इंग्लिश याने ३० धावा केल्या. श्रेयर अय्यर याला ४५ धावांवर असताना दिग्वेश राठी याने मयांक यादव याच्याकडे झेलबाद केले. नेहल वाढेरा याने १६ धावा केल्या. त्याला प्रिंन्स यादव याने त्रिफळाबाद केले. तर मधल्या फळीतील शशांक सिंग याने नाबाद ३३ धावा केल्या. स्टॉयनिस याने नाबाद १५ धावा केल्या. ५ अवांतर धावा संघाला मिळाल्या. पंजाबचा गोलंदाज अर्शदीप सिंग याने ३ फलंदाज बाद केले. तर अझमतुल्ला ओमारझी याने २ बळी टिपले. चहल याने १ बळी टिपला.

लखनौकडून खेळताना सलामीवीर मार्कराम १३ धावांवर अर्शदीपच्या गोलंदाजीवर त्रिफळाबाद झाला. तर मिचेल मार्श हा भोपळा न फोडता तंबूत माघारी परतला. आयुष बदोनी याने ७४ धावा तर अब्दुल समद याने ४५ धावा केल्या. बाकी फलंदाज एकेरी धावेवर बाद झाले.

संक्षिप्त धावफलक पंजाब : प्रभासिमरन ९१, श्रेयर अय्यर ४५, जोश इंग्लिश ३०, शशांक सिंग ३३, स्टॉयनिस १५, एकूण २० षटकांत २३६/५

लखनौ : मार्कराम १३, आयुष बदोनी ७४, अब्दुल समद ४५, मिलर ११, पुरन ६, पंत १८, आवेश खान १९, प्रिन्स यादव १ एकूण : २० षटकांत १९९/७